Вышыўка, посцілкі, традыцыйныя рамёствы і нават бортніцтва – сабралі для вас 5 цікавых інстаграмаў пра матэрыяльную і нематэрыяльную культуру Беларусі. Падпісвайцеся, натхняйцеся і духоўна ўзбагачайцеся!
Belarusian Culture
Гэта душэўны блог пра беларускую фолк-культуру, як матэрыяльную, так і духоўную; мастацтва, вырабы, прыгажосць і родныя карані. Аўтар расказвае пра саломапляценне, батлейку, абрадавыя гульні, вышыўку, культурніцкія падзеі – дакладна знойдзеце штосьці цікавае для сябе.
Беларускія майстры і іх праца
Тут расказваецца пра таленавітых людзей, чыя творчасць звязана з рамёствамі і традыцыйнымі мастацтвамі Беларусі: ткацтва, пісанкі, разьба па дрэве, маляваныя дываны, набойка… Не проста матэрыяльная культура краіны – а менавіта гісторыі сапраўдных творцаў.
Традыцыйная беларуская вышыўка
Аўтарка акаўнта спадзяецца, што ён змусіць вас закахацца ў беларускую традыцыйнцю вышыўку. Тут вы знойдзеце фатаграфіі вышыўкі ў розных тэхніках і розных часоў стварэння, з прыватных калекцый, а таксама беларускіх музеяў і выстаў. Чыстая прыгажосць і натхненне!
Посцілкі, дываны
Посцілкі – гэта від мастацкіх тканін, якія выкарыстоўваліся і як дываны, і як пакрывалы, прасціны, фіранкі, і як самастойныя дэкаратыўныя элементы беларускай хаты. Традыцыйны тэкстыль, самабытныя арнаменты з розных куточкаў краіны – усё дзеля натхнення, не на продажу.
Братэрства босых бортнікаў
А гэта блог пра развіццё ляснога бортніцтва на Палессі. Рабяты расказваюць пра жыццё пчол, гісторыю бортніцтва, нават маюць свой Першы бортны канал на YouTube і робяць падкаст «Бортныя хронікі» – якое гэта замілаванне, калі людзі так любяць сваю справу. «Слава Пчолам! Гонар бортнікам!» – падпісваемся пад дэвізам гэтага інстаграма.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
Фота і відэа: Instagram.com.