Выдавецтва «Тэхналогія» напісала ў сацсетках, што перажывае складаны перыяд: у краму стала заходзіць значна менш людзей, продажы падаюць, а праца ўсё часцей трымаецца на энтузіязме. Каманда звярнулася да чытачоў з просьбай не пакідаць беларускія кнігі без увагі.
Выдавецтва «Тэхналогія» апублікавала эмацыйны допіс у сацыяльных сетках, у якім адкрыта распавяло пра свае праблемы. Па словах каманды, яшчэ некалькі гадоў таму ў кніжнай краме ў цэнтры горада было людна, асабліва перад святамі, а сёння здараюцца дні, калі не прыходзіць ніводзін пакупнік.
У выдавецтве падкрэсліваюць, што праблема не ў адсутнасці працы з іх боку. «Тэхналогія» актыўна вядзе сацыяльныя сеткі, запускае рэкламу, рэгулярна праводзіць сустрэчы з чытачамі, прэзентацыі і аўтограф-сесіі. Каталог таксама шырокі – ад дзіцячых кніг і мастацкай літаратуры да навуковых, гістарычных і нон-фікшн выданняў на беларускай мове. Кошты, як адзначаюць у камандзе, застаюцца даступнымі.
Сваю просьбу выдавецтва сфармулявала проста: калі беларуская кніга важная, ёй патрэбна жывое чытацкае падтрымліванне. Купля кніг, візіты ў краму ці заказы анлайн – усё гэта дапамагае выдавецтву працягваць працу.
«Бывае не стае сіл, апускаюцца рукі, хочацца усё кінуць, але глыбей уздыхаем, падымаемся і зной ідзем; хацелася, каб наперад! Але гэта залежыць і ад вас, дарагія, чытачы! Прыходзьце, чытайце, набывайце кнігі, смакуйце родную беларускую мову», – напісалі ў сваім допісе прадстаўнікі «Тэхналогіі».
Дзе можна набыць іх кнігі?
Кніжная крама выдавецтва «Тэхналогія» знаходзіцца на вуліцы Ляўкова, 19. Таксама кнігі можна набыць анлайн на сайце tn.by з аплатай картай або праз АРІП, а дастаўка працуе па ўсёй Беларусі і за мяжу.
Перепечатка материалов CityDog.io возможна только с письменного разрешения редакции. Подробности здесь.
