Сёння, 9 снежня, у Мінску на завулку Чарвякова, 7, будаўнікі пашкодзілі вадаправод дыяметрам 600 мм. З-за гэтага ў 14:45 адбылося зніжэнне ціску ў некалькіх кварталах, а прыватныя дамы аказаліся падтопленымі. Пра гэта паведамілі ў «Мінскводаканале» і МНС.
Пашкоджанне дапусціла будаўнічая арганізацыя «СУ-173 Трэст №15». Аварыя адбылася каля 14:45. Без нармальнага ціску вады аказаліся вуліцы Нававіленская, Чарвякова, Багдановіча, Някрасава, Арлоўская і Шаўчэнкі.
Затапленне раёна пасля пашкоджання вадаправода. Скрыншоты: @mchs112by, Telegram.com.
Аварыйныя брыгады «Мінскводаканала» адразу пачалі работы па лакалізацыі пашкоджання і аднаўленні сеткі.
У МНС паведамілі, што ратавальнікі дапамагаюць дамам, якія аказаліся падтопленымі.
«Ратавальнікам на нумар 112 паступаюць паведамленні ад насельніцтва аб падтапленні падворкаў прыватных дамоў у раёне завулка Чарвякова ў г. Мінску. Да месца выкліку накіравана тэхніка МНС для адпампоўкі вады. Сітуацыя адбылася з прычыны прарыву трубы халоднага водазабеспячэння ў Цэнтральным раёне па Даўгінаўскім тракце».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
