Беларускі праект «Тлумач», які развівае ідэю адукацыі без гвалту і стрэсу, абвясціў пра пошук экспертаў і экспертак для індывідуальных заняткаў. Фаўндарка праекта Ганна кажа, што мэта ініцыятывы – зрабіць навучанне больш чалавечным і даступным, а таксама даць магчымасць настаўнікам і вучням камфортна ўзаемадзейнічаць без фраз кшталту «не задавай лішніх пытанняў».
У «Тлумачы» будуць рады тым, хто любіць тлумачыць складанае простымі словамі, гатовы падзяліцца ведамі і падзяляе каштоўнасці гуманнай адукацыі. Каб падаць заяўку, трэба запоўніць форму ў Google.
Фармальная педагагічная адукацыя не абавязковая – важнай з’яўляецца сама экспертыза і жаданне вучыць з павагай да чалавека. У базе ўжо ёсць спецыялісты самага рознага профілю: ад замежных моў, матэматыкі і праграмавання да Canva, Java і малявання. Праект адкрыты для экспертак і экспертаў з любых сфер.
У гэтым годзе каманда «Тлумача» таксама запусціла Боціка – штучны інтэлект, навучаны на правераных кнігах і даследаваннях па негвалтоўнай камунікацыі. За некалькі месяцаў ён дапамог больш чым 600 беларускім бацькам разабрацца ў складаных сітуацыях з дзецьмі. Цяпер ён пашырае функцыі і вучыцца кансультаваць не толькі пра камунікацыю, але і пра навучанне і творчасць.
Боцік «Тлумача». Фото: @tlumac_me, Instagram.com.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
