11.08.2025

У Мінску пакажуць будынкі, што не перажылі вайну ці змяніліся пасля абнаўлення

16 жніўня ў 15:00 у Мінску на плошчы Свабоды, 15, пройдзе лекцыя пра страчаны канструктывізм горада. Уладзімір Садоўскі пакажа і раскажа гісторыі будынкаў, якія былі ўзведзены ў 1920-я, але не захаваліся або змяніліся да непазнавальнасці пасля вайны.

Мастацкая галерэя Міхаіла Савіцкага запрашае 16 жніўня ў 15:00 на лекцыю «Страчаны канструктывізм Мінска». Яе правядзе краязнаўца і даследчык міжваеннай архітэктуры Уладзімір Садоўскі.

Афіша лекцыі «Страчаны мінскі канструктывізм».

Афіша да лекцыі. Фото: @Minskcitymuseum.

У 1920-я гады канструктывізм істотна паўплываў на аблічча Мінска. Але значная частка тых будынкаў не дайшла да нашых дзён – многія былі разбураны падчас вайны, іншыя страцілі свае рысы падчас пасляваеннага аднаўлення.

На лекцыі ўдзельнікі ўбачаць прыклады такіх аб’ектаў, даведаюцца пра іх гісторыю і змяненні, якія адбыліся за апошнія дзесяцігоддзі. Арганізатары абяцаюць, што сустрэча будзе цікавая ўсім, хто захапляецца архітэктурай і гісторыяй Мінска.

Дзе: Мастацкая галерэя Міхаіла Савіцкага на плошчы Свабоды, 15.
Калі: 16 жніўня ў 15:00.

Што такое канструктывізм?

Канструктывізм – гэта архітэктурны стыль, які быў папулярны ў СССР у 1920–1930-я гады. Ён з’явіўся як адлюстраванне ідэй новага часу: будынкі павінны быць не прыгожымі дзеля прыгажосці, а зручнымі і функцыянальнымі. Архітэктары выкарыстоўвалі простыя геаметрычныя формы: кубы, цыліндры, прамавугольныя блокі, часта з плоскімі дахамі, і адмаўляліся ад дэкаратыўных дэталей. У ход ішлі сучасныя на той час матэрыялы: жалезабетон, шкло, метал.

У Мінску ў гэтым стылі будавалі дамы-камуны, клубы, адміністрацыйныя будынкі. Некаторыя з іх, як Дом урада, захаваліся, але многія былі знішчаны падчас вайны або настолькі перабудаваны ў пасляваенныя гады, што страцілі свой першапачатковы выгляд.

Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.