Калісьці на гэтым месцы быў закінуты бабулін участак, зарослы палыном. Цяпер сюды прыязджаюць па прыгожыя фота, лавандавыя букеты, мёд і адпачынак у апідоміку. Сёння CityDog.io расказвае гісторыю Вольгі Леановіч, якая пакінула стабільную працу інжынеркай і разам з мужам стварыла «Блакітны сад» у вёсцы Дуравічы.
Як усё пачалося?
У вёсцы Дуравічы Вілейскага раёна Вольга і Аляксандр Леановічы ўжо некалькі гадоў ствараюць «Блакітны сад» – лавандавую лакацыю, куды прыязджаюць на фотасесіі, па букеты і духмяныя сувеніры.
Для Вольгі гэта месца невыпадковае: яна родам з Маладзечна, але ў дзяцінстве часта бывала ў Дуравічах у бабулі. Пазней Вольга паступіла ў БНТУ, пераехала ў Мінск і доўгі час працавала інжынеркай па падрыхтоўцы вытворчасці на машынабудаўнічым прадпрыемстве.
Паводле слоў Вольгі, праца была стабільнай, з добрымі калегамі і нармальным заробкам. Але з часам ёй стала не хапаць творчасці і адчування, што вынік працы можна ўбачыць не толькі ў справаздачах.
У 2015 годзе Вольга ўспомніла пра бабулін участак у Дуравічах. На той момант ён ужо даўно стаяў без догляду: там не было ні плота, ні пабудоў, а сама тэрыторыя зарасла травой і палыном. Вольга з мужам Аляксандрам вырашылі прывесці ўчастак у парадак і пабудаваць там дом.
Спачатку яны расчышчалі тэрыторыю, займаліся будаўніцтвам і паступова ўладкоўвалі месца. А потым Вольга купіла першыя чатырнаццаць саджанцаў лаванды. Пасадзіла іх, даглядала, хвалявалася, а праз год убачыла першае цвіценне.
Пасля гэтага яна пачала больш даведвацца пра лаванду: чытала, як яе вырошчваць, якая патрэбна глеба, як паліваць, абразаць і ўкараняць чаранкі. Гатовыя кусты Вольга не купляла – пасадачны матэрыял вырошчвала сама.
З часам ідэя стала большай, чым проста некалькі кустоў на ўчастку. Вольга зразумела, што хоча зрабіць лавандавае поле. Тым больш участак быў дастаткова вялікі, а засаджваць яго бульбай сям’я не хацела.
Так з’явіўся «Блакітны сад» – сямейная лавандавая лакацыя ў вёсцы Дуравічы. Цяпер на ўчастку растуць сотні кустоў лаванды, а Вольга і Аляксандр ствараюць другое поле. У планах – высадзіць яшчэ некалькі тысяч чаранкоў.
А што было самым складаным?
Вольга прызнаецца, што адным з самых складаных этапаў было вырасціць пасадачны матэрыял. Лаванда патрабуе часу: каб атрымаць добры вынік, патрэбна некалькі сезонаў догляду. Пры гэтым цвіце яна нядоўга – каля трох тыдняў. Каб зрабіць якасныя сухацветы, лаванду трэба своечасова зрэзаць.
Першы час Вольга сумяшчала праект з асноўнай працай. Удзень яна была інжынеркай, а вечарамі і на выхадных займалася ўчасткам, раслінамі і будаўніцтвам. З часам стала зразумела, што сумяшчаць гэта складана, і Вольга вырашыла сысці з найму.
Пасля звальнення яна пайшла вучыцца фларыстыцы, каб рабіць букеты з уласнай лаванды. Потым асвоіла мылаварэнне, а пазней прайшла навучанне ў фіташколе. Так вакол поля пачаў з’яўляцца невялікі брэнд: букеты, аромасашэ, натуральнае мыла, свечкі з пчалінага і соевага воску і іншыя лавандавыя сувеніры.
У лавандавым праекце Вользе дапамагае муж
Сямейны праект Вольга робіць разам з мужам. У сацсетках яны пішуць, што Вольга адказвае за лаванду і ідэі, а Аляксандр дапамагае з будаўніцтвам і ўладкаваннем участку. Напрыклад, ён пабудаваў дроўніцу, якую госці часта выкарыстоўваюць для фота.
Яшчэ адна частка праекта – апідомік. Гэта драўляны домік на вуллях для адпачынку: унутры ёсць лежакі, а пад імі, за перагародкай, знаходзяцца пчаліныя сем’і. Прамога кантакту з пчоламі ў гасцей няма.
У «Блакітным садзе» тлумачаць, што людзі прыходзяць у апідомік, каб спакойна паляжаць, паслухаць гудзенне пчол і падыхаць паветрам з водарам воску, траў і лаванды. Пры гэтым у такога адпачынку ёсць супрацьпаказанні: алергія на прадукты пчалярства, цяжарнасць, абвастрэнне хранічных захворванняў, высокая тэмпература, інфекцыйныя працэсы і стан алкагольнага ап’янення.
А як праект успрымаюць суседзі?
Спачатку суседзі не вельмі разумелі, навошта на ўчастку вырошчваць лаванду. Вольга ўспамінае, што некаторыя казалі: лепш бы пасадзілі бульбу. Але з часам да праекта прывыклі. Цяпер мясцовыя нават раяць «Блакітны сад» знаёмым.
Сёння туды прыязджаюць госці з розных гарадоў Беларусі. Паводле слоў Вольгі, былі і наведвальнікі з-за мяжы – напрыклад, з Парыжа і Дубая.
«Блакітны сад» працуе як лавандавая лакацыя для прагулак і фотасесій. Для гасцей падрыхтавалі рэквізіт: капелюшы, кошыкі, столік для сняданку, вінтажны ровар і мальберт.
Наведванне каштуе 70 руб. за гадзіну для кампаніі да чатырох чалавек, за кожнага наступнага госця трэба даплаціць 15 руб. З панядзелка па чацвер ёсць асобная цана для аднаго чалавека – 25 руб. Кожнаму госцю абяцаюць лавандавы сувенір.
Акрамя лаванды, у Вольгі і Аляксандра ёсць яшчэ адно хобі – квадрацыклы. У вольны час яны выязджаюць па палях і лясах. Вольга кажа, што лаванда для яе – гэта спакой і павольны рытм, а квадрацыклы – спосаб пераключыцца і атрымаць зусім іншыя эмоцыі.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
