Кампанія «Таксі 135» заклікае кліентаў размаўляць па-беларуску і нават праводзіць для гэтага моўныя практыкаванні. Мэта – дапамагчы ўзбагаціць слоўнікавы запас і адчуць асалоду ад роднай мовы.
Таксі 135 запусціла ініцыятыву, якая заклікае беларусаў больш выкарыстоўваць беларускую мову падчас паездак. У кампаніі прапануюць пачаць з простага кроку – выбраць беларускую мову ў наладах тэлефона або мабільнага дадатку «Таксі 135».
Гэта, як піша каманда службы таксі ў сацсетках, першае практыкаванне. Наступнае – напісаць у каментарыях слова па-беларуску, якое дапаможа падтрымаць размову з кіроўцам падчас паездкі.
«Мы пачынаем!» – напісалі ў кампаніі і паказалі фота з дзяўчынай каля машыны таксі 135. Ініцыятыва заклікае людзей выкарыстоўваць родную мову ў паўсядзённым жыцці і паказвае, што гэта можа быць лёгка і цікава.
Як у Беларусі справы з таксі?
Калі памятаеце, CityDog.io пісаў, што з 1 лістапада 2024 года ў Беларусі ўступіў у сілу ўказ «Аб аўтамабільных перавозках пасажыраў»: тады кошты на таксі ў Мінску і іншых гарадах краіны рэзка павысіліся.
Нягледзячы на несуцяшальныя прагнозы прадстаўнікоў сферы, у Мінтрансе запэўнівалі, што павышэння тарыфаў на паездкі ў таксі не чакаецца. Там казалі, што галоўная мэта ўказа – «упарадкаваць рынак перавозак, зрабіць яго адкрытым, а паездкі пасажыраў – бяспечнымі». Але адразу пасля ўступлення ўказа ў сілу пасажыры пачалі скардзіцца на якасць працы таксі і рэзкі рост цэн.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
Фота: @Taxi135minsk.
